Llamazares Oliveras, Diana

Diana Llamazares Oliveras é investigadora predoctoral no Grupo de Investigación de Bioquímica e Bioloxía Molecular (ACUIBIOMOL). Licenciouse en Ciencias do Mar en 2017 pola Universidade de Vigo e, entre 2019 e 2021, cursou o Máster Interuniversitario de Acuicultura (UVIGO‑USC‑UDC), realizando unha estadía en Stolt Sea Farm que lle serviu para o seu TFM sobre o cultivo industrial de rodaballo en Galicia.

Desde 2022 desenvolve a súa tese doutoral no marco do Plan de Ciencias Mariñas de Galicia (PCCMMG), integrado no programa nacional ThinkInAzul, baixo a dirección de Luz Pérez‑Parallé (USC) e Susana Nóvoa (CIMA). A súa investigación céntrase na acuicultura, co obxectivo de establecer un protocolo de acondicionamento de reproductores de almeixa fina mediante factores abióticos, incluíndo varias estadías no Centro de Investigacións Mariñas de Ribadeo (CIMA‑Xunta de Galicia). Ademais, estuda os efectos do cambio climático sobre o ciclo reprodutivo de poboacións desta especie en Baldaio (Galicia).

Actualmente participa como Técnica de Grao Medio en Investigación no proxecto CALIMAR “A calidade do medio mariño litoral e o seu efecto sobre o marisqueo”, financiado pola Xunta de Galicia, Consellería do Mar – Redemar (2024‑2026). O proxecto avalía o impacto ambiental dos polígonos de cultivo de mexillón nas rías galegas para orientar a xestión sostible do marisqueo e a acuicultura. As súas funcións inclúen o procesamento de mostras biolóxicas de moluscos, con extracción de ARN total, avaliación de integridade e pureza, cuantificación espectrofotométrica e fluorimétrica, e preparación de mostras para análise transcriptómica e secuenciación.

É membro do Consello Científico do Instituto de Investigación do Medio Acuático para Unha Saúde Global (iARCUS).